Steingrímur J. Sigfússon:
Herra forseti. Hér er farið fram á heimild til að ábyrgjast fyrir hönd ríkissjóðs sjálfskuldarábyrgð lántöku Flugstöðvar Leifs Eiríkssonar hf., til endurfjármögnunar á allt að 2.500 millj. kr. Ég ætla að sjálfsögðu ekki að leggja stein í götu þess að þetta fyrirtæki geti endurfjármagnað hluta af miklum skuldum sínum. En ég vek athygli á því að hér er verið að lýsa því yfir að áform um að hlutafélag um Flugstöð Leifs Eiríkssonar gæti sjálfstætt og á eigin forsendum ráðið við fjárskuldbindingar sínar eru í reynd að renna út í sandinn. Nú þarf fyrirtækið sjálfstæða ríkisábyrgð til að inna af hendi eða framlengja hverja afborgun fyrir sig þegar hún gjaldfellur. Þetta er auðvitað ekki í samræmi við þau fögru fyrirheit og þær miklu væntingar sem menn höfðu uppi þegar fyrirtækið var stofnað um að töfrastafirnir miklu, hf, mundu leysa þarna allan vanda.