Landbúnaðarráðherra (Guðni Ágústsson):
Hæstv. forseti. Svar við fyrstu spurningunni er svo að í lögum um framleiðslu, verðlagningu og sölu á búvörum, 29. gr., er ákvæði um að sláturleyfishafa sé skylt að leggja til kjöt til útflutnings, semja um skipti á kjöti við sláturleyfishafa sem hefur leyfi til útflutnings eða gera verktakasamning við útflutningshús um slátrun þess hluta innleggs búsins sem þarf að flytja úr landi. Sé þess ekki kostur er sláturhúsleyfishafa heimilt að greiða tiltekið gjald af hverju kílói kjöts sem er ætlað að standa undir kostnaði við að koma jafnmiklu magni á erlendan markað til að halda jafnvægi á markaði innan lands.
Í reglugerð nr. 524/1998, um útflutning á kindakjöti, er að finna nánari ákvæði um þessa framkvæmd. Þar er tilgreint að sláturleyfishöfum sé skylt að gera áætlun um vinnslu kjöts til útflutnings samkvæmt þeirri útflutningsskyldu sem á þeim hvílir eða greiðslu gjalds. Eigi þeir ekki kost á að flytja út það magn sem þeim ber á grundvelli ákvæða reglugerðarinnar og búvörulaga hafa Bændasamtök Íslands gert samning um söfnun og úrvinnslu á skýrslum frá sláturleyfishöfum um framleiðslu, ráðstöfun og birgðir kjöts, þar með talið kindakjöts. Mánaðarlega berast skýrslur fyrir 15. hvers mánaðar sem bera með sér hverjar eru birgðir í upphafi mánaðar, framleiðsla, sala, útflutningur, rýrnun og birgðir í lok mánaðar. Skýrslur um útflutning eru bornar saman við álagða útflutningsskyldu og þannig fylgst með fullnustu hennar. Sláturleyfishafar hafa frest til 1. nóvember árið eftir að slátrun á sér stað til að ljúka útflutningi. Hafi útflutningur ekki verið í samræmi við álagða útflutningsskyldu er útflutningsgjald lagt á sem síðan á að nota til kaupa á kjöti sem flutt er úr landi.
Í öðru lagi: ,,Ef svo er, hve mikil hefur sú sala orðið og hvernig hefur sú breyting komið fram í ákvörðun um útflutningsskyldu næsta árs?``
Svar: Einn sláturleyfishafi hefur ekki lokið uppgjöri á útflutningsgjaldi fyrir haustið 1999. Á næstu dögum verður farið yfir stöðu útflutningsins, miðað við 1. nóvember, og borin saman við álagða útflutningsskyldu haustið 2000. Þann 1. október var ólokið útflutningi frá sl. hausti á um 260 tonnum af kjöti vegna Goða hf., Kjötumboðsins og tengdra fyrirtækja. Fyrir liggur að verið er að selja þetta kjöt á innanlandsmarkaði þrátt fyrir andmæli Bændasamtaka Íslands. Bændasamtök Íslands munu krefjast þess að útflutningsgjald verði viðurkennt sem forgangskrafa vegna væntanlegra tilrauna til nauðasamninga hjá Goða hf., Kjötumboðinu. Verði ekki fallist á þetta er ljóst að verulegur hluti þessara fjármuna mun því ekki innheimtast. Einn sláturleyfishafi óskaði eftir að greiða útflutningsgjald vegna slátrunar haustið 2000 og hefur gengið frá greiðslum. Verið er að vinna í útflutningi á kjöti vegna þessa.
Þann 1. október var ólokið útflutningi vegna 1999 og 2000 á 536 tonnum. Þar af voru 340 tonn vegna þeirra fyrirtækja sem að framan er rætt um. Eftir sláturtíð í haust er því áætlað að um 1.900 tonn verði til af útflutningsskyldu kjöti. Að því leyti sem álagt útflutningsgjald nægir ekki til að flytja útflutningsskylt kjöt úr landi samanber ofangreint er óhjákvæmilegt að leysa þetta mál með hækkaðri útflutningsskyldu á heildina á næsta ári eða árum ef svo fer.
Í þriðja lagi: ,,Hvernig hafa sauðfjárbændur fengið skil á verðmun?``
Svar: Af kjöti sem er útflutningsskylt en er selt innan lands er lagt á útflutningsgjald. Því gefur sú sala framleiðendum engan verðmun.