Ásta R. Jóhannesdóttir (um fundarstjórn):
Herra forseti. Ég vil ítreka þá beiðni að ráðherrar láti svo lítið að vera viðstaddir þessa fjárlagaumræðu. Það gæti verið svo að þingmenn sem taka þátt í umræðunni vildu eiga orðastað við þessa ráðherra. Ég vek aftur athygli á því að þetta eru rammafjárlög þar sem við þurfum að eiga orðastað við hvern og einn ráðherra varðandi þær breytingar sem er verið að gera á fjárlögunum.
Þess vegna ítreka ég þá beiðni mína að ráðherrarnir láti svo lítið að vera viðstaddir þá umræðu sem fer hér fram, þriðju og síðustu umræðu um fjárlög.