[prenta uppsett í dálka] 47. fundur, 127. lþ.
Össur Skarphéðinsson:
Herra forseti. Hér er tillaga um hækkun á tryggingagjaldi sem við leggjumst gegn. Sú hækkun er í reynd skattlagning á vinnuafl og hún ýtir undir verðbólgu. Hún er algerlega í andstöðu við vilja verkalýðshreyfingarinnar sem ríkisstjórnin er nú loksins að drattast til að tala við og þó fyrr hefði verið.
Það er líka athyglisvert miðað við það á hvaða höndum stjórn þessa máls hefur verið í þinginu að Verslunarráð lítur svo á í umsögn sinni til efh.- og viðskn. að skýringar stjórnvalda á þessu séu í andstöðu við gildandi lög. Þessi breyting, þessi hækkun leggst þyngst á lítil fyrirtæki sem ekkert eiga nema mannauðinn. Þess vegna kemur hún verst við sprotafyrirtæki sem eru frjóangarnir inn í framtíðina og eru nú þegar fleiðruð upp á herðablöð eftir meðferð ríkisstjórnarinnar. Greining Þjóðhagsstofnunar sýnir jafnframt að þessi hækkun mundi lenda langþyngst á landsbyggðinni og þess vegna er í reynd hægt að kalla þetta landsbyggðarskatt. Við erum á móti þessu í Samfylkingunni og þess vegna leggjum við til að þessi grein falli brott.
