[prenta uppsett í dálka] 48. fundur, 127. lþ.
Frsm. meiri hluta efh.- og viðskn. (Vilhjálmur Egilsson) (andsvar):
Virðulegi forseti. Það er út af ummælum hv. þm. um ójafnræði á milli fyrirtækjaskattlagningar og einstaklingsskattlagningar sem ég stend hér upp. Ég vil aðeins vekja athygli á því að í mörgum löndum í kringum okkur er hæsta skattþrep töluvert miklu hærra en hér á landi, t.d. í kringum 60%, jafnvel 65%. Í þeim hinum sömu löndum eru virkir fyrirtækjaskattar líklega 30, 35, 40%. Og ég hef ekki orðið var við það að þeir skattar og sá mismunur sem þar er á einstaklingssköttum og fyrirtækjasköttum færi neitt mjög illa með þau hagkerfi. Væri því fróðlegt að vita á hvaða alþjóðlegu reynslu hv. þm. byggir þetta mat sitt, að það verði svo gífurlegt ójafnræði og óhagræði af þeim mismun sem verður á fyrirtækjasköttum og einstaklingssköttum hér á landi.
