[prenta uppsett í dálka] 48. fundur, 127. lþ.
Frsm. meiri hluta efh.- og viðskn. (Vilhjálmur Egilsson) (andsvar):
Virðulegi forseti. Mér finnst að hv. þm. sé að tala sitt á hvað um skatttekjur ríkissjóðs af einstökum sköttum, bæði hér á landi og annars staðar, og svo talar hún í sumum tilvikum um skattprósentur. Ef við berum saman t.d. effektífar skattprósentur í Evrópulöndum og effektífar skattprósentur hér eins og þær eru fyrir þá lækkun sem stendur fyrir dyrum hefur effektíf skattprósenta á arð í atvinnulífi verið í mörgum tilvikum hærri hér á landi vegna þess að eignarskatturinn hefur verið það hár. Nú er hins vegar verið að breyta því og lækka þetta þannig að skattheimta okkar af arði í atvinnulífi verði nokkuð sambærileg við það sem best gerist.
En ég var að spyrja hv. þm. um ákveðið atriði þar sem hún ræddi um mismunun á skattheimtu af einstaklingum og skattprósentu fyrirtækja vegna þess að í Evrópulöndum mörgum hverjum er jaðarskatturinn, þ.e. hæsta skattprósentan, miklum mun hærri en hér á landi, kannski 55, 60, 65% jafnvel. Í þeim löndum sem jaðarskatturinn hefur verið þetta hár hefur hin almenna skattprósenta í atvinnulífinu verið töluvert miklu lægri, kannski á bilinu 30--40%, sem hefur verið hin effektífa skattprósenta. Þetta hefur ekki haft nein gífurleg skemmandi áhrif fyrir hagkerfi þessara landa vegna þess að mörg þeirra eru í hópi best stæðu hagkerfa heimsins. Ég var þess vegna að athuga hvort hv. þm. hefði einhvern alþjóðlegan samanburð eða alþjóðlega reynslu til að vitna til í þessu sambandi. Það er ekki. Það kom hér fram.
