Gunnar Birgisson:
Virðulegi forseti. Ég tel rétt að renna yfir nokkur atriði í þessu ágæta frv. frá ríkisstjórninni. Þetta er eitt af þeim betri frumvörpum sem ríkisstjórn Davíðs Oddssonar hefur flutt og til mikilla framfara og hagsældar fyrir landið og íbúa þess, þrátt fyrir miklar úrtölur vinstri manna sem er alveg með ólíkindum að hlusta á og sitja undir. Ég var því miður staddur erlendis þegar 2. umr. fór fram en ég get ímyndað mér út á hvað hún hefur gengið.
Ef við förum yfir helstu liði í frv. verður fyrst fyrir lækkun tekjuskatts hlutafélaga úr 30% í 18% sem gerist á árinu 2002 og kemur til framkvæmda á árinu 2003. Á sama tíma lækkar tekjuskattur samvinnufélaga og samlagsfélaga úr 38% í 26%. Það er svo merkilegt með þetta, og er hægt að leita fanga víða í því máli, að ef skattar á einstaklinga og félög eða tekjuskattar á fyrirtæki lækka þá aukast tekjurnar.
Það hefur verið talað um írska efnahagsundrið. Það vildi þannig til að við fórum nokkrir þingmenn í opinbera heimsókn með forseta Alþingis til Írlands og áttum viðræður við þarlend yfirvöld, þar á meðal forsætisráðherrann, Bertie Ahern. Þeir hafa lækkað skatta misjafnlega mikið, úr 40% niður í 20%, niður í 10% og þar undir, mismunandi eftir hvar menn eru staðsettir, hvort þeir voru á Shannon eða í kringum Cork eða hvaða erlendu félög áttu í hlut. En þegar þetta átti stað, árið 1998, fjórfölduðust skatttekjur af tekjuskatti fyrirtækja.
Ef við förum svo aftur til þess tíma er sömu kappar og hér tala sem mest réðu ríkjum, eins og hv. þm. Steingrímur Sigfússon, til ársins 1989, voru tekjuskattar á fyrirtæki 50%. Ef menn fletta upp í þessu skilaði þessi tekjuskattsstofn ekki mjög miklu. Fyrirtækin voru í því að reyna að auka rekstrarkostnað og fjárfestu til að auka fyrningar og minnka skattgreiðslur. Það er bara þannig með fé, hvort sem það eru peningar eða sauðfé, að það leitar skjóls og þannig var það í þessu tilfelli.
Hér er líka talað um að standa þurfi undir velferðarkerfinu. Það gerist náttúrlega ekki nema með verðmætasköpun, með skattgreiðslum og atvinnu og auknum tekjum einstaklinga. Það veldur mér því miklum vonbrigðum að fulltrúar vinstri manna, Samfylkingar og Vinstri grænna, skuli ætla að sitja hjá við atkvæðagreiðslu um þessi frumvörp og Vinstri grænir hafa lýst sig andvíga því í nánast öllum atriðum. Það er alveg með ólíkindum.
Við erum auðvitað að reyna að laða fyrirtæki inn í landið með þessu. Það er alveg ljóst og við erum líka að hindra að fyrirtæki fari héðan í burtu. Við verðum að átta okkur á því að við búum á eyju í Norður-Atlantshafi, tiltölulega langt frá Evrópu og Bandaríkjunum. Við erum kannski ekki í rosalega góðri aðstöðu þannig að skattaleg aðstaða okkar verður að vera betri en hjá öðrum þjóðum. Það er alveg ljóst.
Ef við skoðum önnur lönd í þessu samhengi --- hér var talað um að í samanburði við Norðurlöndin væri þetta þvílík skattaparadís --- þá hefur orðið mikill flótti af fyrirtækjum á Norðurlöndunum til annarra landa. Þróunin hefur verið sú að lönd hafi verið að lækka skatta á fyrirtæki. Írar hafa legið undir ámæli frá Evrópusambandinu, miðstýringarvaldinu í Brussel. Því er haldið fram að þeir megi ekki vera með lægri skatta en aðrir í Evrópusambandinu. Þeir hafi ekki sinnt því enn þá og vonandi þurfum við ekki að svara fyrir svoleiðis hluti. Ég tel að þetta eigi eftir að færa Íslendingum hagsæld til lengri tíma, það sem hér er verið að gera.
Í öðru lagi er verið að hækka fríeignamat eignarskatts og einstaklinga, sérstaks eignarskatts, um 20%. Það er reiknað með að áhrif á tekjur ríkissjóðs verði 1 milljaður kr. vegna þess arna. Eignarskattur er vondur skattur og það hefur verið talað um að hann mundi hverfa með tímanum og getur vart nokkur maður verið á móti því. Síðan er talað um afnám sérstaks eignarskatts á lögaðila og einstaklinga, að það lækki tekjur ríkissjóðs um 800 millj. kr. Það er lítill ágreiningur um þetta.
Þá er gert ráð fyrir lækkun almenns eignarskatts á lögaðila og einstaklinga, úr 1,2% í 0,6%. Það er talað um að brúttóáhrif á tekjur ríkissjóðs verði 3,1 milljarður kr. Ekki gerist þetta allt strax heldur mun hluti af þessu taka gildi á næsta ári og síðan annar hluti árið 2003.
Hækkun frítekjumarka á sérstökum tekjuskatti einstaklinga er um 15% vegna tekna á árinu 2001 og þá lækka tekjur ríkissjóðs um 600 millj. Skattskylda húsaleigubóta er afnumin á árinu 2002 og reikna má með að ríkissjóður verði af um 150 millj. Það virðist ekki vera mikið ósamkomulag um þetta atriði.
Þá er hækkun almenna tryggingagjaldsins um 0,77% sem kemur til framkvæmda í staðgreiðslu frá 1. jan. 2003 og menn hafa verið að gagnrýna það hér að í samningum milli ....
(Forseti (GuðjG): Nú verður forseti að biðja hv. þm. að gera hlé á máli sínu þegar vel stendur á. Það stendur til að fresta þessu dagskrármáli.)
Já, herra forseti, ég á ekki mjög langt eftir þannig að ég vildi gjarnan fá að ljúka ræðu minni.
(Forseti (GuðjG): Það er dálítið mikið af andsvörum líka. Þau verða þá að bíða þangað til málið verður tekið fyrir síðar.)
Það er sem sagt reiknað með að þetta hafi áhrif á tekjur ríkissjóðs upp á 2,5 milljarða til jákvæðs hluta. Varðandi tryggingagjaldið sem á að hækka --- auðvitað gerir hækkun tryggingagjalds, sem er þó það lægsta í Evrópu, það að verkum að fyrirtækjunum er kannski heldur þrengri stakkur sniðinn í launahækkunum. En ef tryggingagjaldið verður lækkað aftur fagna ég því.
En frumvarpið sem slíkt verður auðvitað að fara í gegn. Við höfum næsta ár til að gera nauðsynlegar breytingar á þessu. Frumvarpið verður að fara núna í gegn til að fyrirtækin viti hvar þau standa, hvort sem það eru innlend fyrirtæki eða erlend. Það er algjörlega nauðsynlegt.
Herra forseti. Ég lýk þá máli mínu í bili og held svo áfram þegar umræðu um byggðamál er lokið.