[prenta uppsett í dálka] 48. fundur, 127. lþ.
Kristján L. Möller (andsvar):
Herra forseti. Hjá hæstv. ráðherra kom fram að hún vænti þess að samstaða næðist um að veita peningum í framkvæmd byggðaáætlunar. Ég hygg að það sé rétt. Og ég hygg að í því liggi að það á eftir að ná samstöðu við Sjálfstfl., samstarfsflokkinn í ríkisstjórn, til að gera kröftugt átak í byggðamálum ef ekki á að fara enn þá verr en þau tíu ár sem hæstv. forsrh. fór með byggðamál. Það eru einhver svörtustu ár í sögu byggðamála á Íslandi.
Hæstv. ráðherra notaði orðin ,,því miður`` í því sambandi að ekki hefði tekist að leggja fram skýrslu að nýrri byggðaáætlun núna eða þá skýrslu sem hér er verið að ræða núna. Ég hygg, herra forseti, að þegar sagan verður skrifuð, bæði í tíð fyrrv. byggðamálaráðherra, hæstv. forsrh., og eins á fyrstu árum hæstv. byggðamálaráðherra í dag, verði hún langbest sögð með því að segja einfaldlega: Því miður.
