Jóhann Ársælsson:
Hæstv. forseti. Það hefur auðvitað valdið vonbrigðum að þessi síldarstofn skuli ekki hafa stækkað og gengið í meiri mæli inn í íslensku lögsöguna. En það eru fleiri ágreiningsatriði milli stjórnarandstöðunnar og stjórnarflokkanna í þessu máli heldur en það hvernig um þessa skiptingu var samið. Það er ekki síður ágreiningsatriði hvernig menn gengu frá skiptingu á þeim stofni milli útgerðarmanna á Íslandi. Það mál liggur þannig að þeir sem hafa úthlutun í þeim veiðirétti munu eignast allan þann síldarstofn sem syndir til landsins að óbreyttum lögum. Það er auðvitað eitt reginhneykslið ofan á annað í einkavæðingu Íslandsmiða og þeim aðferðum sem hefur verið beitt til þess að koma eignarhaldi á allt sem syndir lifandi umhverfis strendur landsins hvernig menn hafa þarna farið að. Ég vildi bara minna á þá umræðu í þessu samhengi að hún mun óhjákvæmilega koma upp og þá munu menn horfa framan í hvernig hér hefur verið farið að ef ekki verður búið að breyta þeim ólögum sem hér gilda í þessu efni.