Iðnaðarráðherra (Valgerður Sverrisdóttir):
Hæstv. forseti. Þann 14. júní sl. voru gefin út leyfi til að reisa og reka virkjun í Botnsá í Súgandafirði og í Burstabrekkuá í Ólafsfirði.
Ráðuneytinu barst þann 25. mars umsókn um leyfi til að reisa og reka vatnsaflsvirkjun með allt að 500 kílóvatta afli í Botnsá í Súgandafirði. Í samræmi við ákvæði 11. gr. orkulaga var óskað álits Orkustofnunar á umsókninni og gerði stofnunin athugasemdir við rennslismælingar vegna virkjunarinnar. Að fengnum frekari ábendingum umsækjanda og frekari gögnum frá Orkustofnun var talið rétt að gefa út virkjanaleyfi enda lá fyrir sú ákvörðun Skipulagsstofnunar að fyrirhuguð virkjun væri ekki líkleg til að hafa í för með sér umtalsverð umhverfisáhrif og skyldi því ekki háð mati á umhverfisáhrifum.
Á grundvelli þessa og samkvæmt heimild í 10. gr. orkulaga veitti ég leyfi til að reisa og reka allt að 400 kílóvatta vatnsaflsvirkjun í Botnsá með þeim fyrirvara að samkomulag tækist við aðra eigendur vatnsréttinda um afnot þeirra.
Ráðuneytinu barst þann 29. mars umsókn um leyfi til að reisa og reka allt að 500 kílóvatta virkjun í Burstabrekkuá í Ólafsfirði. Í samræmi við ákvæði 11. gr. orkulaga var óskað álits Orkustofnunar á umsókninni og mælti Orkustofnun með því að leyfi yrði veitt vegna fyrsta áfanga virkjunarinnar með því skilyrði að gerður yrði samningur um orkuviðskipti við Rafmagnsveitur ríkisins. Fyrir lá sú ákvörðun Skipulagsstofnunar að fyrirhuguð virkjun væri ekki líkleg til að hafa í för með sér umtalsverð umhverfisáhrif og skyldi því ekki háð mati á umhverfisáhrifum.
Á grundvelli þessa og samkvæmt heimild í 10. gr. orkulaga veitti ég leyfi til að reisa og reka 260 kílóvatta vatnsaflsvirkjun í Burstabrekkuá í Ólafsfirði með því skilyrði að gerður yrði samningur um orkuviðskipti við Rafmagnsveitur ríkisins.
Þetta er svarið við þeirri spurningu sem hv. þm. ber hér upp. Til viðbótar get ég sagt vegna þeirra orða sem hún lét falla --- hún velti fyrir sér á hvaða leið við værum í raun með þessar virkjanir --- að ég held að það sé ósköp skýrt. Það á a.m.k. að vera það. Við viljum gjarnan að þessi möguleiki sé fyrir hendi og erum að fikra okkur áfram í sambandi við það að koma málum þannig fyrir að hægt sé að fá skýr svör við beiðnum og fyrirspurnum sem berast í ráðuneytið og til ýmissa annarra aðila varðandi þessi mál.
Við verðum samt að hafa alveg á hreinu að það þýðir ekki að fara út í framkvæmd sem þessa nema það sé rekstrarlegur grundvöllur og fram hafi farið áreiðanlegar vatnsrennslismælingar, og það ekki bara einu sinni heldur í nokkur ár vegna þess að auðvitað getur veðurfarið verið mismunandi og þetta þarf að vera öruggt hvað varðar vatnsrennsli.
Síðan þarf að liggja fyrir að viðkomandi aðili geti selt þessa orku ef hann hyggst selja, ef hann hyggst ekki nýta þetta til heimilisnotkunar eða vegna síns búrekstrar. Þá þarf að liggja fyrir að orkufyrirtæki sé tilbúið að kaupa orkuna.
Af því að hv. þm. nefndi líka þann stýrihóp sem hefur verið að störfum undir forustu embættismanns ráðuneytisins er hann kannski fyrst og fremst hugsaður til að leiða þá aðila saman sem þarna hafa bæði þekkingu og ákveðnar skyldur, eins og t.d. Orkustofnun í sambandi við leyfisveitingar, og þannig eigi leiðin að verða greiðari fyrir viðkomandi leyfishafa. Eins og hv. þm. veit þarf ráðherra, samkvæmt lögum, að veita leyfi þegar um ákveðna stærð virkjunar er að ræða. Mér finnst sjálfri að við séum að fikra okkur áfram í því að koma málum þannig fyrir í ráðuneytinu að þeir aðilar sem þurfa á upplýsingum að halda fái þær. Ég geri mér fulla grein fyrir því að við höfum átt í einhverjum byrjunarörðugleikum og eflaust eru einhverjir óánægðir með gang mála hvað varðar hraða á svörum og annað slíkt en við skulum vona að úr rætist.