Sigríður A. Þórðardóttir (andsvar):
Herra forseti. Það er nú einmitt það sem verið er að gera. Það er verið að gæta samræmis á milli skólanna þannig að fullt jafnræði sé með nemendum sem stunda nám í þessum þremur háskólum, þ.e. Háskóla Íslands, Háskólanum á Akureyri og Kennaraháskólanum. Því er verið að innheimta sömu gjöld af nemendum.
Það er rétt að ég rifji það upp að það var að sjálfsögðu litið til þess, þegar skrásetningargjaldið á nemendur í Kennaraháskólanum var ákvarðað á sínum tíma hvert gjaldið væri við Háskóla Íslands og Háskólann á Akureyri. Hins vegar var lögum um Háskóla Íslands breytt árið 1996 í kjölfar álits umboðsmanns og þá var sett inn upphæðin 24 þús. kr. sem síðar var svo breytt þegar nýja löggjöfin um Háskóla Íslands var samþykkt og það var líka gert í kjölfarið á rammalöggjöf um háskóla.