Einar K. Guðfinnsson:
Virðulegi forseti. Það hefur komið skýrt fram í umræðum um þetta mál að með því frv. sem núna er að verða að lögum er dregið mikið úr þeirri tekjulækkun sem blasti við smábátum sem róa í krókaaflamarki og byggðarlögum sem eru háðar útgerðum þeirra. Þetta hafa stjórnarliðar jafnt og stjórnarandstæðingar sagt, og er höfuðatriði. Jafnframt eru lögleidd ákvæði sem draga úr brottkasti á fiski og er þannig með áhrifaríkum og ábyrgum hætti tekið á alvarlegu máli. Þess vegna segi ég já.