[prenta uppsett í dálka] 56. fundur, 127. lþ.
Guðmundur Árni Stefánsson (andsvar):
Herra forseti. Það mátti skilja á fyrri hluta ræðu hæstv. ráðherra að hann hefði nánast samviskubit yfir að hafa staðið að hinni myndarlegu uppbyggingu félagslega íbúðakerfisins á Íslandi sem átti sér stað hjá vinstri stjórninni 1988--1991. Hann talaði um að þá hefðu verið byggðar hinar auðu íbúðir. Þær voru auðvitað ekki auðar á þeim tíma en þær hafa tæmst í tíð þessarar ríkisstjórnar.
Herra forseti. Ég held að hæstv. ráðherra ætti þvert á móti að vera stoltur af verkum þeirrar stjórnar nema hann hafi alveg gjörsamlega tapað áttum og misst sjónar á öllu því sem félagslegt er.
Lokaorð hans hér, herra forseti, í þá veru að í tíð þessarar ríkisstjórnar hafi tími hinna félagslegu úrræða runnið upp á þessum vettvangi eru slík öfugmæli að maður verður satt að segja orðlaus. Það gerist ekki oft en nú er ég orðlaus.
