Guðjón A. Kristjánsson (andsvar):
Herra forseti. Alveg gerði ég mér það ljóst að ég var hér eingöngu að marka réttarstöðu þeirra sem lengi höfðu búið í sveitum, og var ekki að marka réttarstöðu þeirra sem væru að taka við búi eða hefja búskap. Ég var eingöngu að horfa til þess að í sveitum landsins er á jörðum mikið af eldra fólki sem hefur litlar tekjur. Og bændur hafa almennt litlar tekjur. Ég tel það algjörlega óviðunandi, herra forseti, að á þetta fólk sé lögð sjálfkrafa sú kvöð að það eigi jafnvel að borga helming af árslaunum sínum í girðingarkostnað á móti einhverjum skógræktarmanni eða nýbónda í hrossum.