[prenta uppsett í dálka] 69. fundur, 128. lþ.
Árni Steinar Jóhannsson (andsvar):
Virðulegi forseti. Hæstv. iðnrh. fullyrðir í ræðustól við framsetningu frv. að frjálsræði hjá öðrum löndum í þeim dúr sem verið er að fara inn á hér hafi gefist vel. Ég spyr: Hvernig getur hæstv. ráðherra fullyrt slíkt þegar fréttir berast frá Noregi t.d. um að hin nýju fyrirtæki háfi inn gróða. Það er gríðarleg hækkun á raforkuverði, sérstaklega í kuldaköstum. Stórvandræði eru á svæðum eins og í Narvík þar sem raforkufyrirtækin komast hjá því að miðla og selja orkuna. Orkuverð í Noregi fór í vetur upp í 14 kr. á kílóvattstundina. Þaðan berast fréttir af gríðarlegum vandamálum í kjölfar breytinganna.
Mig langar að heyra skoðun hæstv. ráðherra á því sem er að gerast t.d. í Noregi og spyrja ráðherrann hvort þetta sé formúla sem hún getur skrifað upp á að hafi gengið nokkuð vel annars staðar, og tekur þá Noreg sem dæmi.
