Árni Steinar Jóhannsson (andsvar):
Virðulegi forseti. Ég var ekki að harma það þingmannsins vegna að málið skyldi koma svona seint fram. Ég var að harma það málsins vegna. Það er náttúrlega öllum ljóst á hinu háa Alþingi að hv. þm. Einar Oddur Kristjánsson er þungavigtarmaður í Sjálfstfl. og það hefði kannski á fyrri stigum verið hægt að koma málum þannig fyrir með tilstuðlan hans, vegna þess að við erum sammála um þessi tvö atriði sem ég nefndi, að við stæðum ekki í þessum vandræðagangi nú og í nefndinni. Það er fyrst og fremst það. Auðvitað fögnum við öllum liðsauka hvað varðar sýn á mál og hvernig á að afgreiða þau. Ég vil að það komi skýrt fram.