Kristján L. Möller (andsvar):
Herra forseti. Ég hlustaði með athygli á hv. þm. Halldór Blöndal flytja ræðu sína og get svo sem tekið undir margt af því sem þar kom fram. Margt ákaflega athyglisvert var sagt, fjallað um hin ýmsu mál og þar á meðal málefni kjördæmisins sem við báðir munum væntanlega sinna á komandi kjörtímabili.
Vegna þess að ég hef áður hlustað á hv. þingmann lýsa hugmyndum sínum um hálendisveg norður til að tengja Norðurland við Reykjavík, svokallaðan Norðurveg sem skírður hefur verið svo með stórum staf í ágætri blaðagrein, er spurning mín til hans þessi: Telur hv. þm. Halldór Blöndal að flutningskostnaður til Norður- og Austurlands muni lækka, og þá hve mikið, lækka verulega eða lítið, þegar þessi væntanlegi Norðurvegur sem er stytting um 80--85 km verður orðinn að veruleika hvenær sem það nú verður?