Guðmundur Árni Stefánsson:
Herra forseti. Ég þakka hv. þm. Jóhönnu Sigurðardóttur fyrir að hreyfa þessu máli og vekja athygli á mikilvægi þeirrar umræðu sem hér á sér stað. Það er á hinn bóginn ástæða til að taka undir með hæstv. forsrh. að vissulega er erfitt að setja fastákveðin og niðurnjörvuð viðmið í þessum efnum, og tæpast er það á færi embættismannanefndar að segja fólki fyrir um lágmark þess sem almenningur geti komist af með í lífi sínu.
Það vekur hins vegar athygli og rifjar upp, herra forseti, að hv. þm. Pétur H. Blöndal hefur ítrekað sagt almenningi frá því að hægt sé að lifa á lágmarksbótum, 70 þús. kr., og heil fjölskylda þar undir. Þar er helsti efnahagsráðgjafi hæstv. forsrh. að verki þannig að kannski getur hæstv. forsrh. farið í smiðju til hans í þessum efnum.