[prenta uppsett í dálka] 73. fundur, 128. lþ.
Heilbrigðisráðherra (Jón Kristjánsson):
Herra forseti. Hv. fyrirspyrjandi ítrekaði þýðingu þessa máls fyrir þá einstaklinga sem þarna eiga hlut að máli. Ég er hv. fyrirspyrjanda sammála um það, enda tók ég það fram í svari mínu að það geti skipt miklu máli fyrir þá að halda áunnum réttindum sínum.
Hv. fyrirspyrjandi kom einnig með hvatningu eða ábendingu um Ástralíu í þessu sambandi. Ég tek þá ábendingu til skoðunar eða tek þeirri ábendingu án þess að ég hafi svör við því á þessari stundu hver framvindan verði í því. Mér er kunnugt um að fjölmargir Íslendingar búa í Ástralíu en þangað voru miklir fólksflutningar á okkar mælikvarða fyrir um 30 árum síðan þannig að mér er vel kunnugt um að þar eru allmargir Íslendingar.
Ég fer því með þessa ábendingu hv. fyrirspyrjanda í farteskinu án þess að ég geti sagt um það á þessari stundu eða svarað hver næstu skref verða. En ég tek ábendingunni.
