Flm. (Kristján L. Möller) (andsvar):
Hæstv. forseti. Hv. þm. Össur Skarphéðinsson spyr mig út í niðurstöður þessarar skýrslu sem þarna kemur fram. Já, það kemur mér ekki á óvart að vitnað er til jafnaðarmannaþjóðfélaganna Svíþjóðar og Noregs þar sem jafnaðarmenn hafa setið við völd stærstan hluta síðustu aldar og eiga þátt í því að búa til það kerfi sem þar er notað til að jafna aðstöðumun fólks á höfuðborgarsvæði viðkomandi landa og landsbyggðinni. Það er t.d. vel þekkt dæmi frá Noregi að þar var þungaskattur í nokkrum þrepum og eftir því sem lengra var ekið, eftir því sem farið var norðar, þeim mun lægri var þungaskatturinn.
Hv. þm. spyr mig hvort niðurstaða þessarar skýrslu sé feluleikur eða jafnvel blekking. Já, að vissu leyti. Ég vil þó nota aðeins betri orð og segja: Ég varð fyrir verulegum vonbrigðum. Ég varð fyrir verulegum vonbrigðum með að ekki komu betri, skýrari og ákveðnari tillögur sem væru þá studdar af hæstv. ríkisstjórn vegna þess að við gerum okkur auðvitað grein fyrir því að þær aðferðir, sama hver er, sem eru notaðar við að jafna flutningskostnað munu alltaf kosta ríkissjóð einhverja peninga, þ.e. réttara sagt mun ríkissjóður ekki fá eins mikið í skatta af flutningskostnaðinum. Það er kannski það versta við þetta.
Herra forseti. Ég vil aðeins í lokin segja að það er auðvitað rétt að skoða þetta í nokkuð víðu sjónarhorni. Lítum á sjónarhorn rekstraraðila á landsbyggðinni sem flytja til sín mjög léttar vörur, t.d. hárgreiðslustofur. Svo eru önnur fyrirtæki sem talað er um að þetta íþyngi allsvakalega, t.d. vélaverkstæði. Það er kannski það eina sem hefur komið út úr þessu, að Byggðastofnun fari í gegnum þetta og kíki á það milli starfsgreina hvort ástæða sé til að beita einhverri mismunun milli þeirra. Það er ljóst, herra forseti, að draga mun úr tekjum ríkissjóðs ef gengið verður í þetta. Ég minni á að þetta er afar brýnt.