[prenta uppsett í dálka] 88. fundur, 128. lþ.
Ögmundur Jónasson:
Herra forseti. Á hátíðarstundum tala menn um lýðræði og mikilvægi þess að efna til þjóðaratkvæðagreiðslu um mikilvægustu mál. Nú kemur í ljós hver alvara er að baki slíkum yfirlýsingum. Við stöndum frammi fyrir ákvörðun um eitt stærsta og afdrifaríkasta deilumál í sögu þjóðarinnar. Þjóðin er skipt í fylkingar en samkvæmt skoðanakönnunum er yfirgnæfandi meiri hluti þjóðarinnar fylgjandi þjóðaratkvæðagreiðslu um Kárahnjúka.
Hlutföllin hér inni á Alþingi eru hins vegar allt önnur því hér eru Kárahnjúkaflokkarnir í yfirgnæfandi meiri hluta.
En nú stöndum við frammi fyrir öðru, að taka afstöðu til lýðræðisins, til þjóðaratkvæðagreiðslunnar. Og nú skulu menn taka eftir því hverjir sitja hjá eða eru á móti, og hverjir eru með lýðræðinu, eru fylgjandi þjóðaratkvæðagreiðslu. Það er ég, og ég segi já.
