Sigríður A. Þórðardóttir (andsvar):
Herra forseti. Ég held að við getum öll verið sammála um að matvælaverð á Íslandi ætti að vera lægra. Það er eitthvað sem við viljum og ég held að allir Íslendingar geti í raun og veru tekið undir að matvælaverðið sé of hátt. Við megum hins vegar ekki gleyma því að margar orsakir geta verið fyrir því. Ýmsir möguleikar hafa verið nefndir í andsvörum manna. Við megum heldur ekki gleyma því að ríkisstjórnin hefur gert ýmislegt. Hv. þm. Kjartan Ólafsson rifjaði t.d. hér upp störf grænmetisnefndar og tollamál, og líka má nefna skattamál. Og ég legg áherslu á að ríkisstjórnarflokkarnir hafa beitt sér fyrir stórkostlegum skattalækkunum á fyrirtæki og það ætti þá að geta skilað sér í lækkuðu matvælaverði.
En það sem ég vil í raun og veru beina athyglinni að er að tölurnar í greinargerðinni ná eingöngu til ársins 2000. Nú vitum við, og það er þegar komið fram, að sá samanburður sem hefur farið fram í Evrópusambandslöndunum eftir að evran var tekin upp leiðir í ljós að hækkanir hafa orðið á vörum og þjónustu þar. Einkanlega er það áberandi á ferðamannastöðum við Miðjarðarhaf og reyndar líka í Þýskalandi. Þessi umræða er mög sterk innan Evrópusambandsins núna. Það verður forvitnilegt að fylgjast með hvað kemur út úr því þegar menn fara í nánari samanburð og rannsóknir á þessu. En ég spyr: Hafa þingmenn Samfylkingar eitthvað skoðað þessi mál, þessa nýju stöðu innan Evópusambandsins, í tengslum við undirbúning þáltill.?