Ísólfur Gylfi Pálmason (andsvar):
Herra forseti. Andsvör geta reyndar verið bæði jákvæð og neikvæð. Í hverri ræðu er ýmislegt sem hægt er að taka undir. Mér finnst full ástæða til að þessi mál séu skoðuð til hlítar. Umræðan er oft og tíðum þannig að í umræðum um verðmyndun á landbúnaðarvörum er t.d. mjög gjarnan ráðist að bændum. Í andsvarinu tók ég dæmi um skilaverð til kartöflubænda. Sama gildir um skilaverð til sauðfjárbænda, skilaverð til þeirra sem framleiða nautakjöt o.s.frv. Þessir aðilar kvarta mjög sáran undan því á hvern hátt sala þessara afurða er og á hvern hátt fákeppni ríkir hér á landi.
Hv. þm. spyr mig hvernig ég hafi brugðist við og hvort mér líði illa í þessari ríkisstjórn eða ekki. Mér líður ekkert illa í þeirri ríkisstjórn. Það eru mörg merki um að við búum í góðu landi. Við erum að skoða fjárlögin og annað slíkt og það er mjög margt gott í sambandi við þau. Mér líður alls ekkert illa í þessari ríkisstjórn, það er mjög langt frá því.
Hafi hins vegar hv. þm. fylgst með umræðu minni, m.a. um neytendamál, þá hef ég mjög oft bent á að mér finnist full ástæða til að fólk geri sér grein fyrir því hvernig verðmyndun vöru er til komin. Þegar hv. þm. kaupir sér sódavatnsflösku úti í búð þá borgum við 210 kr. fyrir tvo lítra. Hver er framleiðsluferillinn? Þetta er vatn í plastflösku sem gasi er skotið í. Þetta er býsna dýrt. Hins vegar erum við oft að kaupa mjög góða landbúnaðarvöru sem er holl og góð og með allt annað framleiðsluferli en ég nefni hér. Við megum passa okkur á að umræðan beinist ekki beinlínis gegn framleiðendum. Ég vil meina að fákeppnin hafi leitt til þess að vöruverð er svo hátt á Íslandi.