Halldór Blöndal (andsvar):
Herra forseti. Ég tel að Samkeppnisstofnun eigi ekki að eyða tíma sínum í skýrslugerð heldur vinna að því að athuga hvort allt sé með felldu í sambandi við þróun á smásöluverði í matvöru. Það hefur komið fram í ræðum þingmanna sem talað hafa að þeir ætlast til þess að stjórnvöld aðhafist eitthvað í málinu og hafa varpað sök á stjórnvöld.
Tæki stjórnvalda til að fylgjast með því að samkeppni sé eðlileg og verðlag eðlilegt í fákeppni er Samkeppnisstofnun og þess vegna beinast ummæli þingmanna að starfsemi þeirrar stofnunar. Þess er að vænta að þeir sem bera ábyrgð á rekstri hennar taki tillit til þeirra óska sem héðan koma og ég vil segja að séu einróma.