Einar Már Sigurðarson (andsvar):
Herra forseti. Ég verð að hryggja hæstv. heilbrrh. með því að ég held að það sé alveg kýrskýrt að hæstv. forsrh. átti ekki við dvalar- og hjúkrunarheimili vegna þess að í þessu paragrafi sem ég vitnaði til er inngangurinn fyrst það sem við vorum að vinna í varðandi skýrslu Ríkisendurskoðunar frá 1999 og þar er m.a. vitnað til Landspítala. Síðan segir hæstv. forsrh. orðrétt, með leyfi forseta, beint á eftir setningunni sem ég las áðan:
,,Ef litið er á samanlögð fjárframlög í fjárlögum til Landspítala og Borgarspítala árið 1997 og borið saman við framlög í fjárlögum 2002 þá hafa þau hækkað um 65--70%, það jafngildir 10--11% árlegri hækkun.``
Þarna tilgreinir hann sérstaklega Landspítala og Borgarspítala þannig að ég held að ekkert fari á milli mála hvað hæstv. heilbrrh. á við. Ég dreg því þá ályktun, herra forseti, að hæstv. forsrh. sé ekki sammála hæstv. forsrh.