Jón Bjarnason (andsvar):
Herra forseti. Hv. þm. Ásta Möller lýsti áhuga sínum á eflingu menntunar og sérstaklega menntunar í heimabyggð, og ég get svo sannarlega tekið undir það með hv. þingmanni.
Það sem kom hins vegar fram hjá hv. þingmanninum í framhaldinu var að hún virðist alls ekki kunna eða vita hver stefna Sjálfstfl. er í menntamálum og hvernig hún hefur verið í reynd.
Sjálfstfl. hefur farið með menntmrn. núna í meira en áratug. Þannig er að framhaldsdeild var í Ólafsvík. Henni var lokað í haust. Framhaldsdeild var á Dalvík fyrir nokkrum árum og skipstjórnarnám. Því var lokað. Verknám úti um allt land og skólar sem reka heimavistir búa við mikil fjárhagsvandræði, og það er niðurskurður á verk- og tækninámi um allt land. Það er hrópað á leiðréttingu en engin leiðrétting fæst.
Hv. þm. Einar Oddur Kristjánsson viðurkenndi þó hér í ræðu áðan að það þyrfti að búa sig undir stóraukin framlög í menntamálum.