[prenta uppsett í dálka] 12. fundur, 128. lþ.
Einar K. Guðfinnsson:
Virðulegi forseti. Aðalgallinn við að ræða um framtíð Orkubús Vestfjarða í því samhengi að sameina það hugsanlega öðrum orkufyrirtækjum er auðvitað að engar forsendur eru fyrir slíkum viðræðum. Hæstv. ráðherra er einfaldlega bundin af ákveðnu samkomulagi. Og samkomulagið kveður á um að óbreyttu rekstrarformi skuli viðhaldið að óbreyttum raforkulögum. Ný raforkulög eru ekki einu sinni komin hingað í hús, þau hafa ekki verið lögð hérna fram. Það er alveg fráleitt að tala á þeim nótum sem hæstv. ráðherra gerir hér, að verið sé að hyggja að sameiningu við fyrirtækið þegar það liggur fyrir að það stenst ekki það samkomulag sem gert var á milli sveitarfélaganna og ríkisins.
Mér finnst að hæstv. ráðherra verði einfaldlega að sýna okkur fram á það að slík sameining geti falið í sér lækkun raforkuverðs. Það hlýtur auðvitað að vera grundvallarmarkmiðið sem menn horfa á. Hver verða áhrifin á orkuverðið í landinu, á orkuverðið á Vestfjörðum, með slíkri sameiningu? Um það hefur ekkert verið rætt, ekkert verið sýnt fram á að orkuverðið muni lækka og þess vegna er fráleitt að tala á þessum nótum.
