[prenta uppsett í dálka] 20. fundur, 128. lþ.
Viðskiptaráðherra (Valgerður Sverrisdóttir) (andsvar):
Hæstv. forseti. Það er ekki rétt sem hér kemur fram. Þessi ákvæði hafa verið alveg skýr frá því að við ræddum þau á þinginu í fyrra, hvernig fara skyldi með vald yfir sjálfseignarstofnunum. Það er ekkert nýtt. Ég endurtek að þetta frv. sem nú er til umfjöllunar breytir ekki þeim lögum sem við settum í fyrra. Það er sem sagt ekki horfið frá því að sparisjóðir geti breytt sér í hlutafélög ef þeim sýnist svo. Mér finnst mjög mikilvægt að það komi fram að það sem kom upp í sumar í sambandi við yfirtökuna var ekki út af því að Alþingi breytti lögum í fyrra á þann veg að hægt væri að breyta sparisjóðum í hlutafélög. Mér finnst þá a.m.k. að mín ábyrgð í sambandi við þessa uppákomu í sumar sé minni vegna þessa.
Ég skal hins vegar alveg taka undir að þetta er áreiðanlega ekki 100% fullkomið frekar en nokkuð annað undir sólinni.
