Samgönguráðherra (Sturla Böðvarsson):
Herra forseti. Ég ætla að vona að hv. þm. hafi verið með handfrjálsan búnað þegar hann ók norður. Ekki er gert ráð fyrir því að menn séu að tala í síma í akstri. Hins vegar er síminn auðvitað mikilvægt öryggistæki og það er aðalatriði málsins.
Mikil umskipti hafa hins vegar orðið í fjarskiptamálum í heiminum á undanförnum árum í tækniþjónustu og lagasetningu. Raunar má segja að þróun síðustu ára hafi gerbreytt hefðbundnum fjarskiptum. Vegna þeirrar fyrirspurnar sem hér er til umræðu vil ég einkum nefna afnám einkaréttar með lögum og aukna farsímanotkun sem setur nú mark sitt á öll samskipti manna á milli. Afnám einkaréttar í farsímaþjónustu hefur leitt til raunverulegrar samkeppni á þessu sviði og segja má að í dag sé virk samkeppni í farsímaþjónustu meira og minna um landið.
Farsímaþjónusta er um margt frábrugðin þjónustu í fastlínukerfinu enda leiðir það af eðli farsíma að þeir ferðast með notendunum. Notandi í þéttbýli gerir þar af leiðandi kröfu um að geta náð sambandi utan þéttbýlis, eins og fram kom hjá hv. þm. Farsímafyrirtækjum sem vilja ná góðri markaðsstöðu er því beinlínis nauðsynlegt að bjóða þjónustu um allt land. Löggjafinn og stjórnvöld hafa t.d. á ýmsan hátt auðveldað samkeppni í farsímaþjónustu utan þéttbýlis, sem er mikið grundvallaratriði, með því nýmæli gildandi fjarskiptalaga sem veita farsímafyrirtækjum aðgang að farsímanetum annarra fyrirtækja þegar uppbygging eigin aðstöðu er óraunhæf.
Þar sem fyrirspurn þingmannsins lýtur öll að GSM-dreifikerfi og þjónustu Landssíma Íslands hf. leitaði ráðuneytið umsagnar félagsins þar um. Það skal tekið fram, eins og ég hef margoft ítrekað á Alþingi, að Landssíminn er hlutafélag sem lýtur sem slíkt lögum einkaréttarins og í því ljósi verður að skoða þau svör sem ég gef hér. Stjórnendur Landssímans hafa áskilið sér rétt til að takmarka svör sín á þann hátt að það trufli ekki samkeppnisaðstöðu fyrirtækisins.
Fyrsta spurningin hv. þm. er:
,,Hversu miklum fjármunum hefur Landssíminn hf. varið til að bæta GSM-dreifikerfið á ári síðustu fimm ár?``
Svarið er að Landssími Íslands hefur fjárfest í dreifikerfi GSM frá árinu 1997. Það segir okkur náttúrlega hversu stuttur tími er liðinn síðan þessi uppbygging okkar hófst. En í það hefur verið varið vel á annan milljarð kr. Auk þess hafa talsverðar fjárfestingar verið í stöðvarbúnaði til að taka á móti aukinni umferð og meiri notendafjölda.
Í öðru lagi spyr hv. þm.:
,,Hver voru helstu verkefnin sem ráðist var í?``
Af hálfu Landssíma Íslands hefur á undanförnum árum verið lögð áhersla á að efla og styrkja dreifikerfið á þeim svæðum þar sem mesta notkunin er. Er þar bæði um að ræða viðbætur og breytingar á kerfinu á þéttbýlustu svæðunum á suðvesturhorni landsins auk þess sem nú er komið GSM-samband á nánast öllum þéttbýlisstöðum á landinu. Einnig hefur verið reynt að koma fyrir sendum í grennd við helstu orlofshúsasvæði og talsverð áhersla verið lögð á að gott samband náist á fjölförnustu vegum landsins með þeim fyrirvörum og takmörkunum sem fram komu fyrr í ræðu hv. fyrirspyrjanda.
Fyrir tveimur árum fór Landssími Íslands hf. í umfangsmiklar breytingar á dreifikerfi á höfuðborgarsvæðinu sem voru nauðsynlegar, bæði vegna ákvörðunar um að veita þriðja rekstrarleyfið á 900 HMS-tíðnisviðinu á því svæði og einnig hefur notendafjöldinn í kerfinu vaxið langt umfram það sem áætlað hafði verið þegar það var upphaflega hannað. Segja má að á síðustu einu til tveimur árum hafi megináhersla fjarskiptafyrirtækjanna verið lögð á að bæta sambandið innan höfuðborgarsvæðisins en alltaf koma upp dæmi um að á ákveðnum svæðum sé samband ekki fullnægjandi, t.d. innan húss hjá fyrirtækjum með mikla notkun sem þurfa mikið að byggja á góðu fjarskiptasambandi.
En á sama tíma og fjarskiptafyrirtækin hafa staðið frammi fyrir auknum kröfum frá viðskiptavinum um betra samband hefur tekið stöðugt lengri tíma að fá nauðsynleg leyfi frá byggingar- og skipulagsnefndum sveitarfélaganna til nauðsynlegra úrbóta.
Í þriðja lagi er spurt:
,,Hvaða áætlanir hefur fyrirtækið um að stórbæta skilyrði GSM-farsímanotenda á næstu árum?``
Landssími Íslands gefur ekki upp, frekar en hin fjarskiptafyrirtækin, neinar áætlanir um stórbætt skilyrði GSM-farsímanotenda enda nær dreifikerfið yfir það stóran hluta landsins að erfitt er að finna möguleika til stækkunar kerfisins sem líklegt er að skili fyrirtækinu fullnægjandi arðsemi, eins og sagði í svari fyrirtækisins. Það er hins vegar ljóst eftir að farsímaeign landsmanna er orðin jafnalmenn og raun ber vitni að öryggi fólks á ferðum um landið eykst með aukinni dreifingu GSM-kerfisins.
Ég vil geta þess að Vegagerðin hefur óskað eftir könnun á kostnaði við að bæta samband á ýmsum fjallvegum. Ég mun leggja mjög ríka áherslu á að því verði hraðað sem mest má verða.