Fyrirspyrjandi (Þorgerður K. Gunnarsdóttir):
Herra forseti. Ég þakka hæstv. dómsmrh. kærlega fyrir þetta greinargóða svar. Ég átta mig á því að mjög mikið verk og vinnu þarf að leggja í þá miklu reglugerð sem fylgir lögum um útlendinga sem taka gildi um næstu áramót. En ég ítreka að á gestir á fundum allshn. kölluðu ítrekað, ár eftir ár, á að þetta yrði gert, þ.e. að þetta yrði fært á eina hendi, ekki bara, eins og ég segi, fyrirtækjunum og þeirra samtökum til hagsbóta heldur ekki síður útlendingum sem sækja um atvinnu- og dvalarleyfi.
Með þessari fyrirspurn má kannski segja að sem þingmaður sé ég að gæta ákveðins eftirlitshlutverks gagnvart framkvæmdarvaldinu. Ég held að það sé gott að löggjafarvaldið og framkvæmdarvaldið skiptist á upplýsingum og skoðunum og fyrir mitt leyti er ég afar ánægð með svarið sem ég fékk frá frá hæstv. dómsmrh. og skil afar vel að það þarf að forgangsraða í þessu eins og öðru. Ég tek heils hugar undir með ráðherra að leggja þarf mikla og vandaða vinnu í þá reglugerð sem kemur til með að byggja á lögum um útlendinga. Hún þarf að vera mjög vönduð. Engu að síður heyri ég á ráðherra að hún ætlar að taka þetta upp við hæstv. félmrh. og er það vel.