Frsm. meiri hluta fjárln. (Ólafur Örn Haraldsson) (andsvar):
Virðulegi forseti. Hv. þm. Jón Bjarnason gerir útgjöld til heilbrigðismála að umræðuefni. Ég tel að það hafi komið skýrt fram í framsögu og eins í þeim tillögum sem liggja hér fyrir frá meiri hluta nefndarinnar að hvergi er tekið jafnhraustlega á eins og hvað varðar tillögur til heilbrigðismála. Þess mátti einnig sjá stað í þeim tillögum sem lágu fyrir í gær varðandi fjáraukalagafrv.
Tillögur til aukinna útgjalda í heilbrigðis- og tryggingamálum eru að fjárhæð rúmlega 1,5 milljarðar sem gerðar eru tillögur um. Það er alveg rétt að það er Landspítali -- háskólasjúkrahús sem fær þar 700 millj., langmest. Það skal líka viðurkennt að betur má gera víða um land, bæði hvað varðar einstakar heilsugæslustofnanir og hvað varðar sjúkrahúsið á Akureyri. Það hefur hins vegar verið metið svo að brýnast sé að bregðast við þessum vanda sem er á Landspítala -- háskólasjúkrahúsi en vissulega er verið að skoða til hvaða úrræða megi grípa hvað varðar sjúkrahúsið á Akureyri.