Drífa Hjartardóttir:
Herra forseti. Ég þakka þessa fyrirspurn og vil segja frá því að til hv. landbn. komu á dögunum þau Sigurbjörg Þorsteinsdóttir og Vilhjálmur Svansson og fóru yfir þetta verkefni sem þau eru að vinna að á Keldum, og sem ég tel að sé mjög mikilvægt að fái að halda áfram. Ég minni á að upp kom hrossapest á Íslandi fyrir nokkrum árum. Það var töluvert afdrifaríkt því að þá var lagt bann við öllum útflutningi á hrossum.
Það kom fram hjá þeim Sigurbjörgu og Vilhjálmi að allt þeirra starf gæti tekið mjög langan tíma og það er ekkert víst að komin verði niðurstaða fyrr en eftir 10--20 ár. En það er mjög mikilvægt að allt þetta rannsóknarstarf fái að vinnast áfram og þau fái þann stuðning sem þarf til þess að það sé hægt.