Frsm. 1. minni hluta fjárln. (Gísli S. Einarsson) (andsvar):
Virðulegur forseti. Það er með ólíkindum að hv. formaður fjárln. skuli varla kannast við þau efni sem farið hefur verið yfir. Það liggur fyrir og er hægt að taka fyrir á einfaldan máta frá síðustu fjárlagagerð, flest þessi tilefni til fjárveitinga lágu fyrir við síðustu fjárlagagerð. Það er þar sem hnífurinn stendur í kúnni og ég tel, virðulegur forseti, mikla ástæðu fyrir hv. fjárln. til að fara yfir vinnulag og vinnureglur. Annars vinnum við eftir fyrirskipun ráðherra en ekki í rauninni að lögum eins og við höfum sett sjálf á Alþingi, þ.e. fjárreiðulög og fjárlög. Þar stendur hnífurinn í kúnni og ég tel að við eigum að fara algjörlega að nýju yfir það hvernig verið er að vinna að fjárlagagerðinni.