Bryndís Hlöðversdóttir (um atkvæðagreiðslu):
Herra forseti. Einkenni efnahagsstjórnarinnar birtist ljóslifandi í þessu frv. og afleiðingar ríkisstjórnarstefnu Sjálfstfl. og Framsfl. má sjá hvarvetna í samfélaginu. Hér á landi er minni hagvöxtur en í nágrannaríkjunum og svo verður áfram á næsta ári. Þetta fer saman við vaxandi atvinnuleysi og stóraukna skuldasöfnun einstaklinga og fyrirtækja. Og erlendar skuldir þjóðarbúsins hafa aldrei verið meiri en nú.
Ríkisstjórnin hefur auk þess fallið í þá freistni að úthluta ótæpilega jólagjöfum í ár sem er síst til að bæta stöðuna. Samfylkingin vill snúa af þessari braut og hafnar alfarið þeirri stefnu sem ríkisstjórnin hefur rekið. Við lýsum því allri ábyrgð á þessum fjárlögum á hendur ríkisstjórninni og munum sitja hjá við tillögur meiri hlutans og þingmanna annarra þingflokka en okkar eigin.