Steingrímur J. Sigfússon:
Herra forseti. Það á að heita svo að þetta fjárlagafrv. sé afgreitt með 11,5 milljarða kr. afgangi en þegar sala eigna er dregin frá er sá afgangur nær allur gufaður upp og í besta falli hægt að segja að afkoma ríkissjóðs sé í járnum. Ef ekki kæmi til sérstök tekjuöflun nú í lokin hefði ríkissjóður verið gerður upp með halla að frádreginni eignasölu.
Pólitíkin í frv. birtist skýrust í skattstefnu ríkisstjórnarinnar þar sem hátekjufólki og gróðafyrirtækjum eru færðar sérstakar jólagjafir. Einstaklingar með yfir 340 þús. kr. á mánuði og hjón með 680 þús. kr., þessum hópum með tekjum þar fyrir ofan er færð 300 millj. kr. jólagjöf á sama tíma og láglaunafólk, öryrkjar og aldraðir bera skarðan hlut frá borði. Velferðarkerfið er svelt, einkanlega heilbrigðis- og menntakerfið.
Núverandi ríkisstjórn, herra forseti er ekki ríkisstjórn almennings í landinu. Þetta er ekki velferðarstjórn. Þetta er ríkisstjórn hátekjufólks og fjármagnseigenda og því fer betur að hér er nú komið að því að hún afgreiði sín síðustu fjárlög.