[prenta uppsett í dálka] 50. fundur, 128. lþ.
Ögmundur Jónasson (andsvar):
Herra forseti. Ég tek undir það að alls staðar þar sem fyrirtækjum eða opinberum stofnunum hefur verið breytt í hlutafélög hefur hið sama verið uppi á teningnum. Réttindi starfsfólks hafa verið skert og nýir stjórnendur þessara fyrirtækja hafa ekki verið reiðubúnir að nýta þau réttindakerfi sem starfsfólki hafa staðið opin.
Ég ítreka að gerðar voru breytingar á Lífeyrissjóði starfsmanna ríkisins, rétt áður en pósturinn og síminn voru hlutafélagavædd, sem opnuðu á þann möguleika að starfsfólkið gæti fengið þar aðild. Yfirstjórnir bæði Landssíma hf. og Íslandspósts hf. meinuðu starfsfólkinu um þetta.
