Jóhanna Sigurðardóttir:
Herra forseti. Með þessu frv. sem hér er tekið til lokaatkvæðagreiðslu er fyrst og fremst verið að bæta hag hátekjufólks og fyrirtækja sem þó greiða langlægstu skatta innan OECD-ríkjanna. Auðvitað er löngu kominn tími til að setja í forgang skattalækkanir á almennt launafólk og lífeyrisþega en það er aldrei á dagskrá þessarar ríkisstjórnar.
Stjórnarflokkarnir hafa nú fellt allar tillögur Samfylkingarinnar um að bæta skatteftirlit og skattframkvæmd. Þeir knýja í gegn nánast óskoðaða grundvallarbreytingu á fyrningarreglum skattalaga sem þýðir mörg hundruð millj. kr. skattatap fyrir ríkissjóð á næstu árum. Sú tillaga var fyrst tekin á dagskrá þingsins nú við 3. umr. sem er til vansa fyrir þingið. Við í Samfylkingunni mótmælum þessum óvönduðu vinnubrögðum og þeirri röngu stefnu sem ríkisstjórnin hefur í skattamálum.