Kristján L. Möller:
Herra forseti. Ég skil ekki þessa viðkvæmni hjá hv. þingmönnum Vinstri hreyfingarinnar -- græns framboðs þótt ég komi hér í ræðustól, við ræðum þetta þegar verið er að tala um að breyta Norðurorku í hlutafélag, og spyrji hv. þm. Steingrím J. Sigfússon, formann Vinstri hreyfingarinnar -- græns framboðs einfaldra spurninga. Hvað hefur breyst frá því að hann var í ríkisstjórn 1991 til dagsins í dag þar sem hamast er svo gegn því að virða sjálfsákvörðunarrétt sveitarfélaga til þess að selja eigur sínar, sama hvort það eru orkufyrirtæki eða hvað, eða breyta þeim í hlutafélag? Hvað hefur breyst í því?