Frsm. minni hluta kjörbn. (Lúðvík Bergvinsson) (andsvar):
Virðulegi forseti. Ég skal reyna að einfalda þetta eins og kostur er.
Það liggur fyrir að Alþingi er úrskurðaraðili um gildi kosningar. Alþingi úrskurðar líka um gildi kjörbréfa. Til þess að Alþingi geti kveðið upp þennan úrskurð þarf það að hafa gögn í höndunum. Það dugar okkur ekki að vita af því að einhvers staðar kunni að liggja skýrslur einhvers efnis úti í bæ, og þá á ég við að það er Alþingi sem er úrskurðaraðili. Ef það liggur ekki fyrir alþingismönnum, eigum við þá að byggja okkar úrskurð, okkar niðurstöðu, á gögnum sem liggja annars staðar? Eru þetta hin tæru rök? Er þetta kjarninn í því að menn vilja ekki fara þá leið sem minni hluti kjörbréfanefndar hefur lagt til? Er þetta allt og sumt sem menn ætla að byggja málflutning sinn á, að einhvers staðar kunni að vera einhverjar skýrslur úti í bæ, ekki lagðar fyrir þingið, sem geri það að verkum að þingið sjálft sem úrskurðaraðili geti tekið afstöðu til málsins?
Það væri skrýtinn dómstóll sem byggði niðurstöður sínar á því að gögn í málinu lægju einhvers staðar annars staðar.