Fyrirspyrjandi (Guðjón A. Kristjánsson):
Virðulegi forseti. Það hagar svo til um þessar mundir að um 20 ár eru liðin síðan framseljanlegt kvótakerfi var tekið upp á Íslandi. Allan þennan tíma hafa handhafar aflaheimildanna leigt frá sér og selt aflaheimildir. Aflaheimildirnar hafa gengið kaupum og sölum og aflamarkið verið leigt innan fiskveiðiársins.
Ég hef sett fram svohljóðandi fyrirspurn til hæstv. fjmrh.:
,,Hvar í lögum er að finna heimild til þess að viðskipti með aflaheimildir séu undanþegin virðisaukaskatti eins og viðgengist hefur undanfarin ár?``
Ég hef farið yfir lög um virðisaukaskatt og ekki fundið beina lagalega tilvitnun um að heimilt sé að standa að málum eins og raun hefur verið á undanfarin ár. Nú kunna ýmsar lagasetningar á ýmsum tímum varðandi stjórn fiskveiða og aðrar lagasetningar, sem snúa að skattalögum og virðisaukaskatti, að hafa áhrif á það hvernig með málið er farið. En hvar sú beina tilvitnun er í lögum sem heimilar að virðisaukaskattur sé ekki inni í þessum viðskiptum hef ég ekki áttað mig á.
Með leyfi forseta langar mig að vitna í bók sem heitir Stjórnkerfi fiskveiða í nærmynd eftir Guðbjörn Jónsson sem skýrir þetta mál kannski með tiltölulega einföldum hætti.
Þar segir, með leyfi forseta, á bls. 140, eftir nokkuð mikla úttekt á málinu og er m.a. vitnað í bréf ríkisskattstjóra frá því í júlí 2002, um breytilega túlkun á meðferð virðisaukaskatts. Þar segir, með leyfi forseta:
,,Sá sem selur veiðiheimild þarf ekki að skrá né skila virðisaukaskatti.
Kaupi fiskvinnsla veiðiheimild, ber henni að skrá kaupin til skila á virðisaukaskatti.
En kaupi útgerð veiðiskips veiðiheimild er henni óheimilt að skrá kaupin í virðisauka. Þar með er augljóst að útgerð veiðiskips fær ekki að færa þennan kostnað sem innskatt, til mótvægis móti útskatti af tekjum.``
Nú hagar svo til, virðulegi forseti, að næstkomandi fiskveiðiáramót fer útgerðin að greiða afkomutengt auðlindagjald. Ég spyr því hæstv. fjmrh. einnig: Hvaða áhrif mun það hafa varðandi virðisaukaskatt af aflaheimildum?