Jóhann Ársælsson:
Hæstv. forseti. Það er skoðun mín og reyndar margra annarra að nú stefni í frekara ójafnvægi í byggðamálum og hafi gert um nokkurt skeið. Við höfum flutt þáltill. um það mál, bæði í fyrra og aftur í haust. Ég tók grannt eftir því er hæstv. utanrrh. orðaði það svo fyrir nokkru síðan að nú væri komið að norðvesturhluta landsins hvað varðar áherslur í byggðamálum.
Síðustu fréttir af málum tengdum byggðamálum eru af nýsköpunarverkefni sem ríkisstjórnin stendur fyrir. Þar kom ýmislegt á óvart, þ.e. hvernig þeim fjármunum var deilt niður. Ég hafði satt að segja ímyndað mér að hvert tækifæri yrði notað til að reyna að jafna eitthvað stöðuna í byggðamálum.
Auðvitað sjá allir að fjármunir hafa í miklum mæli streymt til austurhluta landsins á undanförnum árum. Þar fara nú fram mestu framkvæmdir í sögu ríkisins í orkuiðnaðarmálum. Þar er búið að taka ákvarðanir um að grafa ekki færri en þrenn jarðgöng. Byggðaáætlun var með sérstaka áherslu á þann hluta landsins og allt gott um það að segja. En þetta þýðir, sem ætti að hafa verið mönnum ljóst fyrir löngu síðan, að það þarf að taka á varðandi suma aðra hluti landsins.
Ég spyr hæstv. ráðherra: Hvaða verkefni eða ráðstafanir eru í undirbúningi til að taka á þeim vanda sem í stefnir? Ég sé fulla ástæðu til að spyrja eftir þessu. Ég minni á orð hæstv. utanrrh. hvað þetta varðar.