[prenta uppsett í dálka] 56. fundur, 130. lþ.
Lúðvík Bergvinsson (andsvar):
Virðulegi forseti. Ég sé að hæstv. viðskrh. hefur yfirgefið salinn, mér þætti vænt um að hún væri hér.
Þetta mál á sér náttúrlega sögu sem ég mun kannski rekja aðeins í ræðu minni á eftir. En mig langar að spyrja hæstv. viðskrh. einnar lítillar spurningar. Hún hefur í fjölmiðlum lýst því yfir að hugmyndir mínar og hv. þm. Einars Odds Kristjánssonar, sem við höfum lagt fram, séu í andstöðu við EES-samninginn og eignarréttarákvæði stjórnarskrárinnar. En hæstv. ráðherra hefur á engan hátt útskýrt hvað hún á við.
Mig langaði því að fá skýringar frá hæstv. ráðherra og, ef hægt væri, að ræða þær á málefnalegum grunni en ekki í dylgjuformi sem hæstv. ráðherra hefur haft um þetta í fjölmiðlum.
