Forsætisráðherra (Davíð Oddsson):
Herra forseti. Öllum þeim fyrirspurnum sem beint var til mín samkvæmt þingsköpum var svarað. Hins vegar var ekki svarað fyrirspurnum sem komu fram í kynningu hv. þm. á fyrirspurninni enda voru ekki efni til þess.
Þegar verkið var kynnt á sínum tíma kom fram að Sögufélagið hafði haft tiltekið frumkvæði að máli þessu öllu og miðað við það samstarf sem við höfum átt við Sögufélagið lengi þótti fara vel á því að sú stofnun ætti aðgang og hefði atbeina að útgáfu þessa verks. Samstarfið við það félag hefur tekist afskaplega vel og við erum ánægð með það.