Hjálmar Árnason:
Herra forseti. Ég vil bætast í hóp brýningarfólks úr Suðurk. og tek undir það sem hér hefur verið sagt. Málið þolir ekki frekari bið. Ljósheimar eru á undanþágu. Það er ekki inni í myndinni að fara í neinar endurbætur á því húsi enda er það ekki hannað til þeirrar þjónustu sem þar fer fram núna.
Ég vil hins vegar vekja athygli á því sem hæstv. heilbrrh. sagði, að málið er efst í forgangsröð hjá heilbrrn. og við hljótum því að leggjast á árar með hæstv. heilbrrh. og beina því til samstarfsnefndar um opinberar framkvæmdir, þar hvílir málið. Og þegar heimild kemur þaðan, sem ég trúi ekki öðru en verði á næstu dögum, þá muni málið fara á þann skrið sem því ber og ætti að vera löngu komið á.