[prenta uppsett í dálka] 68. fundur, 130. lþ.
Gunnar Örlygsson:
Virðulegi forseti. Eftir að hafa barist fyrir falli Berlínarmúrsins um áratuga skeið hefur annar múr verið reistur. Bygging nýja múrsins er á landsvæði palestínsku þjóðarinnar og hefur tilvera hans verið harðlega gagnrýnd um allan heim og þá sérstaklega af mannréttindasamtökum.
Aðskilnaðarstefna ólíkra þjóðarbrota hefur alltaf verið gagnrýnd í mannkynssögunni og hefur aldrei átt rétt á sér. Í raun hefur aðskilnaðarstefna undantekningarlaust alið á frekara hatri og úlfúð fylkinga á milli. Nútímahugsunarháttur og nútímaviðhorf hafa breyst í þeirri miklu þróun sem upplýsingasamfélagið hefur alið af sér. Ungt fólk frá öllum þjóðum veraldar hefur í dag langtum betra aðgengi að gangi mála á alþjóðlegum vettvangi. Því er öllum ljóst, nema ef vera skyldi ráðamönnum í Bandaríkjunum og Ísraels, hversu mikil firra bygging hins nýja múrs er.
Bygging múrsins er skýlaust brot á almennum mannréttindum og í raun afturhaldssemi misviturra ráðamanna sem koma vilja á frekari úlfúð og hatri fylkinga á milli og fórna almennum mannréttindum á altari sinnar eigin peningastefnu.
Virðulegi forseti. Íslensk þjóð verður að fordæma þetta verk og gera það í verki.
