Utanríkisráðherra (Halldór Ásgrímsson):
Herra forseti. Með þáltill. er leitað heimildar Alþingis til að staðfesta fyrir Íslands hönd ákvörðun sameiginlegu EES-nefndarinnar um breytingu á XII. viðauka við EES-samninginn og fella inn í samninginn reglugerð Evrópuþingsins og ráðsins um greiðslur yfir landamæri í evrum.
Það er gerð grein fyrir efni ákvörðunarinnar í tillögunni sjálfri og er hún prentuð sem fylgiskjal með henni ásamt þeirri reglugerð sem hér um ræðir. Þessi ákvörðun kallar á lagabreytingar hér á landi og var tekin af sameiginlegu EES-nefndinni með stjórnskipulegum fyrirvara af Íslands hálfu.
Hvað varðar efnisatriði málsins nægir að nefna að með þessari ákvörðun er verið að fella inn í EES-samninginn reglugerð Evrópusambandsins um greiðslur yfir landamæri í evrum. Reglugerðin kveður á um að gjöld fyrir greiðslur yfir landamæri í evrum skuli vera þau sömu og gjöld fyrir greiðslur í evrum innan lands. Jafnframt skulu upplýsingar um kostnað við greiðslur milli landa vera aðgengilegar og mælt er fyrir um ráðstafanir til að auðvelda færslu fjármuna yfir landamæri.
Í viðskrn. er nú unnið að innleiðingu þessarar gerðar.
Ég legg til, herra forseti, að að lokinni þessari umræðu verði tillögunni vísað til hv. utanrmn.