Margrét Frímannsdóttir:
Virðulegi forseti. Þetta er ekki í fyrsta sinn sem við heyrum að ákveðin togstreita er á milli þeirra flokka sem stýra landinu í dag og hafa gert um nokkur ár. Framsfl. hefur spyrnt við fótum gagnvart ýmsu sem Sjálfstfl. virðist hafa troðið inn í stefnuyfirlýsingu ríkisstjórnarinnar 1999 og aftur núna 2003.
Mig langar, virðulegi forseti, aðeins til að vekja athygli á því að í heilbrrn. eru starfandi svo margar nefndir um svo mörg málefni og svo mikil stefnumótunarvinna sem, því miður, virðist stundum fara sitt í hvora áttina, en til þess að hægt sé að ræða um einhver skil á milli kaupanda og veitanda heilbrigðisþjónustu þarf að ljúka þessum störfum. Ráðherra hefur lagt áherslu á það en það er samt kominn tími til fyrir hæstv. ráðherra að samræma þetta starf og ljúka því svo hægt sé að fara í alvörustefnumótun.