[prenta uppsett í dálka] 73. fundur, 130. lþ.
Anna Kristín Gunnarsdóttir:
Frú forseti. Það er rétt hjá hæstv. menntmrh., að það er ákvörðun heimspekideildar að fella niður þetta nám. En það er neyðarúrræði sem heimspekideild beitir í þessu tilviki vegna þess að háskólinn er í vandræðum. Launastikan er kolröng og fellur ekki að því rekstrarumhverfi sem er í Háskóla Íslands í dag. Fimm nemendur bíða þess að fá að ljúka námi og þeir eru settir út á kaldan klaka með þeirri ákvörðun sem tekin hefur verið. Auk þess er, eins og ég sagði í fyrri ræðu minni, þörfin fyrir þessa þjónustu mjög brýn í samfélaginu.
En mig langar að fá frekari útskýringar hjá ráðherra á þeirri tilkynningarskyldu sem hún segir að háskólinn hafi ekki sinnt. Er hún að segja þá að Háskóli Íslands hafi ekki farið að þeim reglum sem honum ber að fylgja í samskiptum við ráðuneytið?
