[prenta uppsett í dálka] 73. fundur, 130. lþ.
Björgvin G. Sigurðsson:
Frú forseti. Í desember á síðasta ári, árið 2003, skipaði þáv. menntmrh., Tómas Ingi Olrich, nefnd til að kanna hvort tilefni væri til að setja lög um eignarhald á fjölmiðlum. Ráðherranefnd þessi var skipuð í kjölfar umræðna um eignarhald á fjölmiðlum þegar ný fjölmiðlasamsteypa í eigu Baugs og fleiri aðila var að verða til. Davíð Þór Björgvinsson, prófessor við Háskólann í Reykjavík, er formaður nefndarinnar og tjáði hann Morgunblaðinu í frétt þann 3. febrúar sl. að nefndin hefði þegar komið saman og nefndarmenn skipt með sér verkum.
Í nefndinni eiga sæti auk Davíðs Þórs þeir Karl Axelsson hæstaréttarlögmaður, Guðmundur Frímannsson, deildarforseti kennaradeildar Háskólans á Akureyri, og Pétur Gunnarsson, skrifstofustjóri þingflokks Framsfl.
Samkvæmt skipunarbréfi nefndarinnar er gert ráð fyrir að hún ljúki störfum 1. mars árið 2004 og sagði Davíð Þór í sama viðtali við Morgunblaðið að allar líkur væru á að það stæðist. Nú er 1. mars 2004 runninn upp og því spyr ég hæstv. menntmrh.:
Hvað líður störfum ráðherranefndar um hvort tilefni sé til að setja lög um eignarhald á fjölmiðlum? Má vænta megi þess að hún skili af sér í dag eða á allra næstu dögum?
