Jón Kr. Óskarsson (andsvar):
Virðulegur forseti. Ég gat ekki betur skilið en að hv. þingmenn, flutningsmenn frv. til laga um breytingu á útvarpslögum, væru að draga í efa trúverðugleika Ríkisútvarpsins og teldu að það þekktist ekki í hinum vestræna heimi að útvarpsstöðvar væru reknar á vegum ríkisins. (SKK: Það sagði ég ekki.) Ef það er misskilningur þá dreg ég það til baka.
Ég vil minna á að BBC er ein virtasta stofnun í heimi og er rekin af ríkinu eins og Danmarks Radio og Norsk Radio. Ég vildi bara koma þessu á framfæri í vangaveltum um hvort ríkisútvarpsrekstur væri barn síns tíma eins og frumvarpsmenn voru að ýja að.